Indian Horror Stories

Real Ghost Stories. Bhoot Story. Horror Stories in Hindi- Episode-237.Hindi Horror Stories.

Mera name ankita hai.. Main mp ke gwalior kee rehne wali hoon.. Waise to mere pariwar me bahut si bhootiya ghatnayein gat chuki hain.. Lekin aaj main aapko do ghatnao ke bare me batane ja rahi hoon.. Ye pehli ghatna mere papa ke sath ghati thi.. Mere papa ka readymade kapdo ka business hai aur aksar papa ghar late hee aate hain.. Shaadi ke season me to papa ko ghar wapis aane me rat 12-1 bhi bajj jate they.. To ek baar.. Ye sal 2018 ki baat hai.. Raat kareeb 12.30 baje ka time tha.. Papa ghar wapis nahi aaye they. us dinn ham sab log bhi ghar me jaldi hee so gaye they..
Fir 12.30 baje ke kareeb papa ghar pahuche to kai der tak darwaja khatkhatae rahe.. Lekin ham sab itni gehri neend me they ke hamein pata hee nahi chala.. Papa kareeb 20 minute tak bahar khade ghanti bajate rahe aur aawazein dete rahe.. Lekin hamein pata nahi chala.. Papa samajh kee lagta hai aaj ye log bahut gehri neend me so rahe hain.. Sardiyo ka time tha.. Upar se raat bhi bahut ho rahi thi.. To papa ne socha kee kyu apne ek dost ke yahan chala jau aaj rat ke liye.. To unhone apne dost ko call kiya aur usko bola kee yahan to koi darwaja nahi khol raha hai.. Main tumhare yahan aa jau kya… to unke dost bole ha han kyu nahi.. Aa jao yahan.. Waise bhi aaj meri wife ghar pe nahi hai..
Aur fir papa ne bike ghumai aur apne dost ke yahan jane ke liye nikal gaye.. Papa ke dost ka ghar jahan padta tha uss jagah ka naam sikander kampoo hai.. Saath hee bata du kee unke yahan jane ka jo raasta tha.. Wo bhootiya rasta maana jata tha.. Log rat me uss raste se jana pasand nahi karte they.. Lekin papa usi raste se nikalne wale they.. Aur jaise hee papa uss raste pe pahuche.. Unki bike apne aap band ho gayi.. Papa bike start karne kee koshish kar hee rahe the kee achanak.. Kisi ne unko jor se dhakka maara.. Papa door jaa gire.. Papa ne jaldi se uth ke idhar udhar dekha.. To papa ko apne peechey 5 bahut hee lambe lambe aadme khade dikhai diye.. Au run sabk logo ke dhad to dikhai de rahe they.. Lekin unke sir nahi they.. Wo dekh ke papa bahut darr gaye.. Papa fir se kisi terah himmat karke uthey aur bike uthane lage to unhone fir se papa ko utha ke door fenk diya.. Wo bar bar papa ko dhakka deke fenke jaa rahe they. Papa ke sir me aur haath pairo me bahut chotein lag gayi thi.. Aur ab unse utha bhi nahi jaa raha tha.. Aaspas se kisi ke jor jor se hansne kee aawaz bhi aa rahi thi.. Tabhi papa ko door ek bike wala jata dikhai diya.. Papa ne usko bahut aawazien mari.. Aawaz sunke wo bike wala ruka bhi.. Lekin kuch der ruk ke fir se wahan se chala gaya.. Pata nahi usne papa ko dkeha bhi tha.. Ya bina dekhe hee wahan se chala gaya tha.. Papa kisi terah mushkil se chaltey huey aage jaane lage.. Aur kuch hee door jake unko ek kaali mata ka mandir dikhai diya.. Mandir dikhtey hee papa jor jor se kaali mata ko naam lene lage.. Kaali mataka naam leke unko thodi himmat mili.. To unhone jaldi se pani bike uthayi aur seedha uss mandir me chale gaye.. Mandir pahcuh ke papa ne peechey uss rate par mudd ke dekha to wahan koi nahi tha.. Lekin wo hansne kee aawaz unko abhi bhi chaaro taraf se sunai de rahi thi.. Papa kuch der mandir me hee ruke aur fir apne dost ke ghar pahuche.. Aur unko saari bat batayi.. Unke dost ko uss raste ke bare me pehle se pata tha.. Unhone bataya kee wo bhootiya rasta hai.. Rat ke samay jo bhi wahan se nikalta hai uske saath yahi sab hota hai.. Wo to tumhari kismat achi hai.. Nahi to aaj tak uss raste par na jane kitne logo ki maut ho chuki hai..
Jo log uss raste par marte hain.. Unki aatma bhi fir us raste par aane jane wale logo ko pareshan karbne lagti hain.. Shukar hai bhagwan ka kee uss din mere papa sahi salamat apne dost ke yahan pahuch gaye..
Ye dusri kahani jo main ab batane ja rahi hoon ye mere chote bhai ke sathi thi.. Ye pichle saal gamiyo ki baat hai.. Main mera choti behan aur chota bhai ham teeno ek hee kamre me soya karte they.. To aise hee ek rat jab ham teeno so rahe they to raat kareeb 2 baje achanak meri aankh khul gayi.. Aankh khuli to maine dekha kee mera chota bhai bed ke ek kone me dubak ke baitha tha… wo pura passene me bheega tha aur bahut dara hua lag raha tha.. Jaise kee usne koi bhoot dekh liya ho.. Maine usi waqt apni behan ko bhi utha diya.. Wo uthi to uski halat dekhkar usko bhi bahut hairaani hui.. Fir hamne uske paas ja ke pucha kya hua tumhe.. Itna dare kyu huey ho.. To jo baat usne batayi wo sunke to ham dono bhi bahut darr gaye.. Usne bataya ke abhi thodi der pehle wo bathroom ke liye gaya tha.. Bathroom se aate huey wo washbasin me haath dho hee raha tha kee tabhi kisi ne uske kandhe pe peechey se haath rakh diya.. Usne peeche mud ke dekha to peechey mummy khadi thi.. Mummy usse darawni aawaz me boli– tu yahan kya kar raha hai.. Ja so ja..
Uss waqt bhai ko thoda sa darr to laga lekin usne haan me sir hila diya.. Usko lag raha tha kee wo mummy hee hain.. Wo bas 2 second ke liye hath ponchne ke liye palta hee tha.. Kee usne dekha kee mummy ab wahan nahi thi.. Mummy achanak wahan se gayab ho gayi thi. Lekin usko to mummy ke room wale darwaje ke band hone ki aawaz bhi nahi aayi thi.. Usne bataya kee jab usne mummy ko dekha to aisa nahi lagg raha tha kee mummy sote huey uth ke aayi hain.. Mummy ke baal bikhre nahi thye.. Lekin mummy ke baal bilkul theek they.. Jaise kee wo bilkul ready ho ke aayi ho.. Uski baat sun ke ham dono bhi bahut darr gaye.. Ham puri rat nahi soye.. Samajh hee nahi aa raha tha kee mummy wahan kya karne aayi thi.. Kyuki unke room me to ek alag bathroom hai.. Fir subah hone par hamne mummy se pucha kee aap rat me bathroom kisliye aayi thi to mummy boli kee wo to raat me uthi hee nahi.. Hamne mummy ko rat kee baat batayi To mummy ko bhi bahut hairaani hui..uss din mere bhai ko bahut tej fever bhi aa gaya tha.. Pata nahi raat me wo kon thi jo meri mummy ka roop lekar wahan aayi thi. Uss din ke baad se mere bhaai ke sath aisi koi ghatna fir kabhi nahi hui..
===========================
Mera naam sarthak rana hai.. Main himachal ke kangra ka rehne wala hoon.. Main aapko apne mama ke sath ghati ek choti si ghatna ke bare me batana chahta hoon ..mere mama chandigarh ke ek hotel me kaam kiya karte they.. Ye 2016 ki baat hai.. Hotel me mama night shift me kaam kiya karte they.. To aise hee ek raat mama 2 baje apni shift puri karke hotel se apne quarter par jaa rahe they.. Mama cycle par they.. Aur jiss raste se wo ghar jaa rahe they wahan ek jagah ek shamshaan ghat padta tha.. Saath hee bata doon kee mere mama sharab peeya karte they.. Aur uss waqt bhi unhone sharab pee rakhi thi.. To cycle chalate huey mama jaise hee uss shamshan ghat ke samne pahuche to unki najar unke pairo ke upar padi.. Mama ne dekha kee unke pair ultey ho rakhe they.. Aur un ultey pairo se hee wo cycle ke paidal chala rahe they.. Wo dekh ke mama bahut darr gaye aur teji se cycel chalatey huey seedha apne oom par pahuch gaye.. Mama ka sara nasha bhi utar chuka tha.. Ghar aake unhone apne pair dekhe to unke pair bilkul normal ho gaye they.. Mama batate hain kee uss raat unhone sharab to pee rakhi thi.. Lekin wo itna nashe me nahi they ke unk apne pair ultey dikhai de.. Pata nahi unke pair apne aap kaise ultey ho gaye they.. Uss rat ke baad mama kai dino tak auto se he hotel aaya jaya karte they.. Iss ghatna ke bad unke sath aisa kuch fir kabhi nahi hua…
===========================
bachpan se lekar bade hone tak mujhey hamesha aisa lagta tha jaise hamare ghar me kuch aisi cheejein maujood hain.. jinko ham dekh to nahi ssaktey.. lekin unki maujoodgi ko bahut ache se mehsoos kar sakte hain.. aur mujhey pura yakeen hai hamare ghar ke andar iss terh ki ek nahi balki bahut sari cheejein maujood hain.. bachpan me na jane mere sath kitni baar ajeeb ajeeb cheejein hoti aayi hain.. lekin abhi. pichle kuch dino se ko kuch mere sath ho raha hai aisa pehle kabhi nahi hua tha… in sab cheejo kee shuruwaat mere paida hone ke pehle se hee ho gayi thi.. meri delivery bahut compicated thi. mujhey paida karte huey mummy ko bahut pareshaani hui thi.. bachna bahut mushkil tha lekin main mari nahi.. fir paida hone ke bad ek sal ke andar hee main teen baar bilkul maut ke kareeb aa ke bachi thi. meri mummy batati hain kee ek baar jab main kuch hee mahiney kee thi.. to mummy ne mujhey apne samne ek palne me sulaya hua tha.. raat me mummy kee aankh khuli to unhone dekha kee kuch saaye mere palne ke paas khade meri taraf jhuk ke dekh rahe they.. dheere dheere main badi hone lagi. wo saye mujhey bhi kabhi kabhi dikhai dete they.. lekin unhone kabhi mera ya mere ghar me kisi ko koi nuksan nahi pahucaya.. sath hee bata du mere papa nahi hain.. mere bachpan me hee unki maut ho gayi thi.. ghar me sirf main meri mummy dadi aur mera bada bhai rehtey they.. jab main 18 saal ki hui to padhai ke liye mujhey dusre shehar me jana pada.. mummy mere sath hee aa gayi thi.. ghar pe bas bhai aur dadi rehtey they.. kuch time baad bhai ki bhi shaadi ho gayi.. aur shadi ke kuch saalo bad hee unke 2 bacche bhi ho gaye..abhi pichle saal main apne bhai ke bete ki birthday party me apne purane ghar gayi hui thi.. halaki main beech beech me ghar jati hi rehti thi.. lekin s baar ghar gaye huye mujhey 2 sal se jyada ho gaye they… shaadi ke baad bhaai ne ghar me kafi kaam karwaya tha.. bahut sare changes bhi karwa diye they.. to meri bhabi mujhye pura ghar ghum ke dikhane lagi.. ham ghar ke peechey wale hisse me they.. peechey ek darwaja tha jo bahar ki taraf khulta tha.. un logo ne uss darwaje ko lock kiya hua tha jisse kee bache peechey se bahar na nikal jaye. darwaje ki chaabi samne hi latki rehti thi.. bhabi mujhye wpo darwaja khol ke dikhana chahti thi.. lekin chaabi nahi mil rahi thi.. aspas sab jagah dekha lekiin chaabi nahi mila.. ab main aur bhabi aamne samne khade iss bare me baat hee kar rahe they.. bhabi keh rahi thi ki chaabi pata nahi kahan chali gayi hai.. ki tabhi.. na jaane kahan se.. hawa me he wo chaabi hamare beech me aa giri.. ham dono hairaani se ekd usre ki taraf dkehne lage.. bhabi boli.. lagta hai usko pata chal gaya hai kee tum aa gayi ho.. ab aapko shayad ye baat ajeeb lage.. lekin hamare ghar me hamein aksar safed kapde pehne ek aurat ghumti dikhai deti thi.. aur almost hamesha hee wo mere aspas hi dikhti thi.. bachpan me jab main palne me so rahi hoti thi to wo mere palne ke pas kahdi dikhti thi.. yahan takki kai baar palne me leti main roti to wo hee meri mummy ka pair pakad ke unko uthati thi.. ye batane ke liye kee main ro rahi hoon.. mere ghar se chale jaane ke baad bhi wo aurat aksar un logo ko kamre ke andar ek kursi pe baithi dikhai deti thi.. lekin ye sab to fir bhi koi badi baat nahi thi.. fir usi din… birthday party ke baad ham sab log hall me baithey baatein kar rahe they.. mere bhai ne bataya kee aksar rat me jab wo uth ke kitchen me paani peene jata hai to frdige pe rakhi sab cheejein achanak hawa me udd ke neechey gir jaati hai.. aisa bahut baar hota hai.. lekin wo cheejein kabhi uske upar nahi girti.. aaspa hi girti hai.. shayad ye jo koi bhi cheej hai usko nuksan nahi pahuchana chahti bas ye batana chahti hai kee tu raat me yahan mat aaya kar.. bateein karte karte 1 baj gaye they.. uske bad ham sab apne apne kamro me sone chale gaye.. mujhey baccho wala kamre hee sone ke liye diya gaya tha.. waise bhi wo pehle mera hee kamra hota tha.. kamre me jaake maine light band ki aur fir kai der tak phone dkehti rahi.. kamre me bilkul andhera tha.. bas ek kone me ek choti si night light lagi thi.. usi se halk halki roshni aa rahi thi.. ab maine sone ke liye aankhein band ki hee thi kee tabhi.. achanak me mere pure shareer me ek sihran si daud gayi.. jaise kee kamre me mere alawa bhi koi maujood hai.. aur meri taraf dekh raha hai.. maine jhat se aankhein khol li aur andhere me hee idhar udhar dekhne lagi.. lekin kamre me koi nahi tha.. maine phone utha ke dekha to uski battery bilkul down ho chuki thi.. ghar ke sab log so chuke they.. maine fir se aankh band kar ke sonekee koshish kee.. lekin dkehey jane kee wo feeling itni strong thi ki mujhey bahut jyada darr lagg raha tha. lekin samajh nahi aa raha tha kyu.. kon tha wahan pe.. maine to iss kamre me apne pura bachpan gujara tha.. aaj se pehle to mujhey itna darr kabhi nahi laga tha.. kuch to gadbad thi.. wo kamre upar first floor par tha.. aur tabhi .. meri najar uspe padi.. kamre kee khidki ke bahar neechey chimney jo upar tak aa rahi thi.. uske bagal me koi khada tha.. koi bahut bada aur lamba.. mujhey sirf uski parchai si najar aa rahi thi.. lekin uski shape insan ke jaisi thi.. uska sir.. kandhey.. shareer sab kuch dikh raha tha.. ek bar ke liye mujhey laga kee shayad ye mere dada ji ki aatma hai.. jo mere janam se pehle hee marr gaye they.. lekin aisa nahi ho sakta tha.. kyuki uss saaye ko dkeh ke mujhey bahut darr lag raha tha.. jaise kee wo mera muksaan karna chahta hai.. meri neend udd chuki thi.. main kisi aur ko bhi pareshan nahi karna chahti thi.. to kisi terh himmat kar kemain uthi aur tv on kar liya.. raat bhar main tv hee dekhti rahi.. beech beech me aankh bhi lagti to ek jhatke se khul bhi jaati.. wo saaaya puri raat wahin khada raha.. aur subah hotey hee wahan se gayab ho gaya. subah hote hee maine kaha kee ab mujhey wapis jana hai.. rat bhar bina soye mere sir me bhi bahut dard ho raha tha. subah nashta kiya lekin nashta karte hee mujhey ulti ho gayi.. uske baad kisi terah main apne yahan wapis to aa gayi.. lekin wapis aane ke baad se hee mujjhey har samay aisa lagne laga jaise koi mere sath hai.. aisa mujhey pehle feel nahi hota tha.. fir kuch time baad ek din mera boyfrend mere yahan aaya hua tha.. rat me ham dono so hee rahe they kee ote sote achanak meri aankh khul gayi… aankh khuli to dekha ki wo mera bagal mee hee baitha tha..aur samne darwaje kee taraf dekh raha tha.. maine usse pucha kya hua.. soye nahi kya.. wo bola nahi.. wo so raha tha lekin oste sote uski aankh khul gayi.. aisa lag raha tha kee kamre me koi aur bhi hai..uske baat sunke main bhi jhat se uth gayi aur darwaje kee taraf dekhne lagi.. lekin tabhi achanak mujhey pata nahi kya ua.. mere pet me tej dard hone laga.. aisa lagne laga jaise abhi mujhey ulti ho jaegi.. tej chakkar aane lage.. main touss waqt apna sir pakad ke baith gayi.. kee kahin chakkar se neechey na gir jaau.. aur tabhi mere muh se ek aawaz nikli– ye tujhey pasand nahi karta..
mujhey nahi pata ye baat mere muh se kaise nikli.. maine to aisa kuch socha hee nahi tha.. lekin mere boltey hee mera bf hairaani se meri taraf dekhne laga.. wo utha aur darwaje ke pas jake upar wali kundi bhi laga di.. mera sirf abhi bhi buri terah chakra raha tha.. main man hee man uss cheej ko kosne lagi.. usse boli jaao.. jao yahan se.. yahan tumhari koi jarurat nahi hai.. s nikal jao yahan se. aur fir kuch hee second baad mere chakkar kam hone lage.. aur main normal ho gayi.. uss din ke baad se mujhey iss terah ke chakkar ya ais akuch to fir nahi hua.. lekin aaj bhi kai baar mujhey lagta hai jaise mere aaspas koi hai.. jo mujhey ghoor raha.. mujhey nahi pata ye jo kuch bhi hai kahan se meere [eechey lag gaya.. kyuki iss ghar me to pehle mujhey kabhi aisa nahi lagta tha.. naa hee mere purane ghar me mujhey kabhi itna darr laga tha.. hamare ghar aaj bhi raat me fridge se cheejein apne ap girti hain.. mujhye lagta hai kee agar main iss nahi darungi to ye kabhi mere upar bhaari nahi ho paaega..
======================================
Main jo kuch aapko batane jaa rahi hoon.. Iski shuruwaat hui thi saal 2012 ki garmiyo me.. Hua aisa tha kee mere husband ka transfer ek natye shehar me hua tha.. Aur wahan jaake hamne ek flat kiraye par liya tha.. Wo ek teen manjila building this.. Jisme ham first floor par rehte they.. Aur hamare neechey wale floor par do ladkiya rehti thi.. Hamse upar waale follr par bhi do ladkiya rehti thi.. To wahan jaake settle hone ke baad .. dheere dheere meri dosti un ladkiyo se ho gayi.. Husband ke office chale jane ke baad main din bhar bahut bore ho jaati thi.. Hamare upar wali ladki ek restraunt me job karti thi.. Usne meri job bhi apne sath usi restraunt me lagwa di.. Sab kuch normal chall raha tha.. Aapko shayad ye bat ajeeb lage.. Lekin hamare neechey jo do ladkiya rehti thi.. Unme se meri sirf ek ladki si hee baat hua karti thi.. Dusri ladki ko to maine dekha tak nahi tha.. Yahan tak kee aaj bhi itna sab kuch ho jane ke baad tak bhi mujhey nahi pata kee wo ladki dikhti kaisi thi.. Khair.. To aise hee ek din.. Meri shift shaam 4 bajee ke thi..
Job pe jaane se pehle main bas room me baithi tv dekhhee rahi thi kee tabhi achanak neechey wale floor se jor jor kee aawazein aane lagi.. Jaise kee koi buri terah darwaje ko kholne kee koshsih kar raha ho.. Shor sharabe kee aawaz bhi aa rahi thi.. Fir kuch seconds tak wo darwaja peetne kee aawaz aati rahi aur fir achanak se shaant ho gayi.. Aur shant hone ke kuch second baad hee ek tej cheekh sunai di.. Neecehy rehne wali ek ladki meri achi frend thi.. Main jaldi se neechey gayi to dekha kee neechey kai sare police wale bhi pahuch chuke they.. Asal me hua ye tha kee neechey rehne wali wo dono ladkiya rehti to ek hi flat me thi lekin wo dono job alag alag jagah karti thi.. Aur unke rooms bhi alag alag they.. Dono kki shifts bhi alag alag hua karti thi.. Isliye unka aapas me milna bhi bahut kam hi hota tha.. Meri frend ne bataya kee usne apni room partner ko pichle kareeb 10 dino se nahi dekha tha.. 10 din se uska room band pada tha.. Lekin ajeeb bat ye thi kee uski scooty bahar kee khadi rehti thi.. Iska matlab wo office bhi nahi jaa rahi thi.. Usne apni room partner ke darwaje par kai baar konock kiya.. lEkin usne darwaje nahi khola.. To aakhir me usne apne makan malik ko iss bare me bataya to makan malik ne police ko bula liya.. Wo jor jor se darwaja peetne kee awaz jo maien suni thi wo poilce ki hi thi jo uske room ka darwaje kholne kee koshish kar rahe they.. Aur darwaja kholne ke baad andar unko uski dead body padi mili.. Usko mare kai dino ho chuke they.. Mujey nahi pata uski maut kaise hui.. Usni suicide kiya tha.. Ya fir kya hua tha.. Maien to uska chehra tak nahi dekha tha.. Police walo ne uski dead body nikali aur wahan se le gaye.. Iss ghatna se wo dusri ladki to itna darr gayi thi kee usne agle hee din wo room change kar lene ka faisla kiya.. Jabki usne abhi kuch hee din pehle 2 mahiney ka advance kiraya bhi diya tha.. Lekin wo ab bilkul uss ghar me nahi rehne chahti thi.. Do din baad jab main ofice se wapis aa rahi thi to maine dekha kee uske ghar ka sara furniture aur dusra saman flat ke bahar rakha tha.. Wo uss ghar ka koi bhi saman saath nahi le jana chahti thi.. Jab ki unme se bahut si cheejein to bilkul nayi thi.. Usne bataya kee unke yahan ye mana jaata hai kee agar ham kisi mare huey insan kee kisi cheej ko use karte hain to uska karj hamare upar pad jata hai.. Isliey aisi koi bhi cheej jisko uski room partner ne ek bar bhi use kiya tha.. Wo tamam cheejein usne kabad ke liye wahin chor di thi.. Fir aakhri din jab neechey wali ladki wahan se sab kuch samet ke wapis jaa rahi thi.. To main bhi uske saath usko see off karne ke liye neechey hee maujood thi.. Wo barish ka din tha.. Aur tej aandi chal rahi thi.. Uske flat ke darwaje ke theek samne ek khidki thi.. Jo khuli thi.. Usne mujhsey kaha kee yee khidki band karna jaruri hai.. Nahi to barish ka paani andar aaega aur makan malik usse extra paise le lega.. Lekin hairani ki baat thi ki wo khud flat ke andar khidki band karne nahi jaa rahi thi.. Maine usse pucha ki tum khud kyu nahi andar jati to wo boli ki uski andar jane me darr lagg raha hai.. Kee kahin uski room partner kee aatma uske peechey na lagg jaye…to aakhir me main hee uske flat ke andar chali gayi.. Wo shaam kareeb 6 baje ka time tha.. Garmi ka time tha.. Lekin kamre me jaate hee maine notice kiya kee wahan bahut hee jyada thand thi.. Aur uss jagah ek ajeeb sa bhaaripan tha.. Main bhoot preto ko nahi manti thi.. Lekin uss waqt wahan jarur kuch tha.. Meri dadi hamesha kaha karti thi.. Kee kabhi tum aisi jagah par jao jahan kisi mari hui aatma ka waas ho..to uss jagah jaa ke ye jarur bol do.. Kee main yahan aapko pareshan karne ke irade se nahi aaya hoon.. Aur aapko mere peechey nahi aana hai.. Maine bhi waisa hee kiya.. Khidki ke paas pahuchke maine kaha kee main sirf khidki band karne aayi hoon aapko pareshan karne ka mera koi irada nahi hai.. Aapko mere peechey nahi aana na hee mujhey koi nuksan pahuchana hai.. Itna keh ke maine khidki band kee aur bahar nikal gayi.. Ye sab hone me bas kuch hee seconds lagi thi.. Lekin mujhey nahi pata tha kee uss din ke bad se meri jindagi me kaisa tufaan aa jaega.. Kai baar us flat ke samne se aate jate meri najar uss flat ke darwaje par chali jaati thi.. Pehle uss flat ke samne se nikalte huey mujhey kuch bhi ajeeb nahi lagta tha.. Lekin iss ghatna ke baad uss jagah ek ajeeb sa bhaaripan rehne laga tha.. Man karta tha bas jaldi se nikal jao yahan se,.. Yahan tak tto fir bhi theek tha.. Lekin fir.. Ye sab kuch mere ghar tak pahcuh gaya.. Mujhey migraine problem shuru ho gayi.. Sir me kisi bhi waqt itna tej dard hone lagta kee main khadi bhi ho paati thi.. Koi bhi tej light meri aankho me padti me to mera sir chakrane lagta.. Main ultiya karne lagti.. Lekin ye sab din me hee hota tha.. Raat me andera hone ke baad mujhey bahut sukoon mehsoos hota.. Matlab kee migrane aur wo chakkar aane band ho jate.. Lekin andhere me mujhey pata nahi kyu har waqt darr lagne laga tha.. Aisa lagta jaise koi mere aaspas hai.. Rat me kitni baar mujhey bahut darawna sapne dikhai dete.. Aur ye kabhi kabhi nahi.. Har ek raat hota tha.. Har raat sone ke baad mujhey bahut darawne sapne dikhai dete. Main darr ke mare neend me hee kaanpne lagti.. Dheere dheere meri tabiyat kharab rehne lagi.. Har waqt mera swabhav bahut chidchida rehne laga tha.. Maine job bhi chor di thi.. Din ho ya raat mujhey.. Aisi aawazeins unai deti jaise koi darwajo ko deewaro ko peet raha ho.. Ye aawazein aisi asi jagaho se aati thi jahan se inka aana possible he nahi tha.. Jaise kee meri almari ke andar se.. Washbasin se.. Main ignore karti rahi.. Lekin fir mere aur mere husband ke beech jhagde hone lage.. Ghar me rakhi cheejein apne aap idhar se udhar ho jati. Kabhi mere husband ki car ki chabki fridge ke andar rakhi milti to kabhi unka office ka laptop sink me rakha milta.. Unko lagta kee ye sab mian karti hoon.. Din me jab main ghar me akeli hoti to tv ka volume apne aap bahut tej ho jata.. Bathroom ka nal apne aap on ho jata.. Aisi hee na jane kitni cheejein hone lagi thi…. Ek din maine room me bed pe sare faila ke rakhe they.. Unko teh kar ke ache se almari me rakhne ke liye.. Isi beech main bas kuch seconds ke liye hee kamre se bahar gayi.. Aur wapis aayi tod ekha kee wo sare ke sare kapde neechey farsh par teen alag alag stacks me ache teh karke rakhe huey they.. Hamare ghar me pakka koi tha.. Jo ye sab kar raha tha.. Mujhey ab uss ghar me akele rehne me bhi darr lagne laga tha.. Mere husband mujhey bahut pyaar karte they.. Lekin unko ye sab samjhana bahut mushkil tha.. Unko lagta tha shayad mere migraine ki wajah se main iss terah ki harkate karne lagi hoon.. Wo bhi koshish karte they kee jyada se jyada time emre sath hee bitaye.. Kai bar mere husband ko ffice ke liye subah jaldi jana hota tha..kai bar wo meri neend na kharab kar ke mujhey sote hua hee chor ke chale jate they.. Lekin jane se pehle wo main door ko bahut ache se band kar ke jaate they.. Ek raat aise hee ek bahut darawne sapne se meri aankh khuli to maine dekha kee mere husband mere bagal me nahi they.. Uss din unki subah 6 baje hee ghar se nikalna tha.. Uss waqt 5 bajj ke 50 minute ka time tha.. Mujhe laga wo abhishayad ghar ke andar hee honge.. Wo dekh ke to meri jaan hee nikal gayi.. Main jaldi se bhaag ke gayi unko dhunde ke liye to wo pure ghar me nahi they.. Upar se maine notice kiya kee ghar kee sari khidiya aur darwaje khule they.. Sari lights on thi.. Yahan tak kee hamara main gate bhi pura khula tha.. Mere husband aisa kabhi nahi kar sakte they.. Theek hamare main door ke samne seedhiya thi.. Jahan se koi bhi hamare ghar ke andar ghus sakta tha.. Sach batau tomain uss waqt itna darr gayi thi kee usi waqt night suit me hee apna phone utha ke seedha neeche bhaag gayi.. Main uss ghar me ab ek pal aur nahi rukna chahti thi.. Nange pair bhaagti hui main seedha building ke bahar parking me pahuchi aur apne husband ko call karke rote huey unko puri baat batayi.. Mere husband ne mujhey samjhane kee bahut koshish kee.. Lekin mere liye abb pani sir se upar gujar chuka tha.. Main abb uss ghar me ek pal aur nahi rehna chahti thi.. Aakhir me mere husband ne faisla kiya ki ham wo flat chor denge.. Lekin isme abhi kuch dina ur lagne wale they.. Is beech main jitne bhi din uss ghar me ruki.. Main Akeli kabhi nahi rehti thi.. Husband ke office jaane ke baad main bahar chali jati thi.. Kabhi kisi frend ke yahan to kabhi kisi restraunt me.. Chahe kuch bhi ho jaye main abb uss ghar me akeli nahi reh sakti thi.. Aur fir ek hafte baad hee hamne wo flat khali kar diya.. Wahans e chale jaane e baad life fir se nromal ho gayi.. Sari ajeeb cheejein hona apne aap band ho gaya.. Aaj iss baat ko beete saalo ho chuke hain.. Lekin mujhey aajtak samajh nahi aaya kee uss ghar me wo kya tha jisne mera jeena haram akr diya tha.. Kya wo neechey wali uss ladki ki aatma thi.. Jo shayad iss baat se naraj thi kee main uske flat ke andar kyu ghusi.. Lekin maine to usse maafi maang li thi..kya sirf ek khaidki band karne kee wjaha se wo mere peechey padd gayi thi.. Ya fir … ye koi aur hee cheej thi.. Jo shayad hamare flat me hamare pehl;e se hee maujood thi.. Aur jisko hamara wahan rehna bilkul pasand nahi tha..
========================
Mera namm krisha h mai mumbai mein ghatkopar ki rehne wali hu .. yeh kahani mere bhai ke ek frnd ki sister ke sath pihle saal yani 2020 ke march me ghati thi.. Un dino corona to bahut faila hua tha lekin tabtak lockdown nahi laga tha.. To ek shaam wo apni job se wapis aa rahi thi.. Uss waqt wo kurla wale station par thi.. Unki train dusri taraf ke platform par aane wali thi.. To wo wahan se utar ke patri par karke aane lagi thi.. Train ko aane me time tha.. Isliye koi dar bhi nahi tha.. Lekin wo patri ko paar kar hee rahi thi.. Kee tabhi unka pair fisla aur wo neechey ja giri.. Unko aisa laga jaise kisi e unko dhakka diya hai. Lekin aas paas koi nahi tha.. Unko thoda ajeeb to laga lekin fir jyada dhyaan na deke wo dusri taraf aa gayi aur train pakad ke gar chali gayi.. Wo theek thaak ghar to pahuch gayi.. Aur uske bad 3-4 dino tak sab kuch theek bhi raha.. Lekin fir.. Achanak unki tabiyat kharab rehne lagi.. Unhone khana peena bilkul kam kar diya tha.. Bas din bhar ghar ke ek kone me akeli baithi rehti..fir dheere dheere unke pure shareer par kharochon ke nishaan banne lage.. Sabko laga shyad garmi ka time hai.. Khujli karne se rashes ho gaye honge.. Lekin dheere dheere ye sab badhne laga.. Unki job bhi chali gayi.. Unke saath Sab kuch ulta hone laga tha.. Gharwalo ko shak hua kee kahin koi aur problem to nahi hai.. To wo unko ahmedabad me unki bua ke ghar lekar gaye.. Unki bua ke yahan ek aunty thi. Jinke andar devi aaya karti thi.. Wo log unko unn aunty ke pas lekar gaye.. Aunty ne usko dekhke bataya kee tumhare upar ek jinn aa gaya hai.. Uss din jab tum wo patri par kar rahi thi tab wo tumhare upar chadh gaya tha.. main aap logo ko bata du kee kurla station ke bare me wahan ke log bhi batate hain ki yahan iss terah kee bahut si cheejein rehti hain.. Fir aunty ne unko babhuti lagayi aur ek dhaaga pehanne ko diya.. Aur haath me bhi ek dhaaga pehanne ko diya.. Fir aunty ne unse pucha kee tum apne pair me ek kaala dhaaga baandha karti thi wo kyu utaar diya.. To wo boli ki wo dhaaga toot gaya tha .. uske baad maine dusra nahi baandha.. Aunty ne bataya kee wo jinn tumhare pair se hee tumhare upar aaya tha.. Aur wo tumhari kab ki jaan le chuka hota.. Lekin tum akeli baith ke krishan ka naam leti rehti thi.. Aur unpar pura vishwas karti thi.. Isliye wo jinn tumhara jyada kuch nahi bigaad saka.. Nahi to wo tum ko pakka maar chuka hota.. Uske baad wo sab log wapis apne ghar aa gaye.. Wo dhaage pehanne ke baad unki tabiyat pehle jaise hone lagi.. Aur wo sab ajeeb cheejein bhi apne aap hona band ho gayi..
===================================

होमपेज पर जाने के लिए यहाँ क्लिक करें
भारत की सच्ची डरावनी कहनाइयाँ सुनने के लिए यहाँ क्लिक करें
जंगलो और सर्च एंड रेस्क्यू की मजेदार कहानियां सुनने के लिए यहाँ क्लिक करें
वेण्डिगो, वरवोल्फ, वैम्पायर और इस तरह के शैतानो की कहानियां सुनने के लिए यहाँ क्लिक करें
फिक्शन कहानियां सुनने के लिए यहाँ क्लिक करें
मेरा Youtube Channel भी जरूर सब्सक्राइब करें – https://www.youtube.com/c/HindiHorrorStories

Related posts
Indian Horror Stories

Real Horror Stories of Hospitals. Episode-249. Hindi Horror Stories. #HHS #HorrorStories #Bhoot

Indian Horror Stories

Horror Story in Hindi- Episode-230. Real Ghost Stories in Hindi.

Indian Horror Stories

Shakini. Episode-248. Hindi Horror Stories. #HHS #HorrorStories #Bhoot #HindiHorrorStories.

Indian Horror Stories

6 Horror Stories in Hindi. Episode-229. Hindi Horror Stories.

Leave a Reply

Your email address will not be published.

error: Get Lost !!